Mubihi ki Risco Lumamezi
Poto ya cwale cwale ya Kopano ya United Democratic Party (UDP) ya kubata kuyo bonana ni mueteleli wa naha Namibia, Hifikepunye Pohamba mane cwalo ni makwambuyu babañwi kwa muleneñi wanaha( windoko) isupelize kusaikutwa hande kwa kopano ye.
Bazamaisi ba kopano ya UDP yeo itabela kupuma sikiliti sa Kapilivi kwa naha Namibia baitukiselize kubonana ni kutolokela tutengo totushelanashelana, Lindumeleti zeli mwa naha Namibia, Ba mayemo a pahami kungelela cwalo ni mueteleli wa naha kuikambota fa taba ya babanyazwa kakubata kupuma sikiliti sa Kapilivi kuli ifite kwa mafelelezo.
Bo mutompehi Chrispin Matongo ili bo Chairperson ba kopano ye ni bo mutompehi Dasken Mulisa, bañoli ba UDP bataluselize babihi ba makande ba Liito la Kapilivi kuli, “Kamazazi ane lubeisize akuyo bonana ni Mueteleli, kinto yene isupelize fokusweu kuli buñata bwa baeteleli batutengo totu shelana shelana, lindumeleti nibona nebali kwanda naha mwa mazazi ane luizo ina kupotela Windoko kuzwa la 18 kuisa la 25 Yenda2010,”
Mulelo wa kuyo bonana ni bona neli kuyo kupa tuso kuama muzeko wa Kapilivi ili wo seungile lilimo ze mashumi ni sili siñwi (11) mi hape usazwela pili kuisiwa kwa pili nako kaufela ki Khuta ye pahami.
“Hakuli cwalo , hakuna sesi ezahezi kapa sesi bonahala kuezahala kuli taba ye ifite kwa mafelelezo. Lukazwela pili kuya kwa tutengo totu shelanashelana kuli lufumane tuso kwa taba ye mane cwalo ni kuba mulao,” mubale sitatimende sene sizo fiwa mwa ofesi ya Mueteleli wa naha ni mwa liofesi za lindumeleti mwa muleneñi kwa Windoko.
Bazamaisi baba tokwa tuso baize, mutomupuso wa naha Namibia usupeza hande fo kusweu mwa article 12 kuli kaufela ya nyazwa uka fumana katulo ye swanela ni kufumana litukelo ze swana mi hape katulo yeo haiswaneli kunga nako ye telele isa ezahali, kacwalo ya nyazwa una ni kulukululwa.
“Mumamele, mwa taba yabona yaku beiwa mwa Tolongo, mutomopuso hau sika latelelwa mi nako ye bata utwa katulo ye swanela ha ika fiwa kamulao,” kwa talusa ba UDP.
“ Mumamele hape, kalulo ya 6(b) ya bubangoki Act No.51 ya silimo sa 1977 ifa maata ku mueteleli wa naha kufa taelo kwa ba atuli kufelisa muzeko kubaba nyazwa ni haike kuli sekucincizwe kayona taba ye. Ka maikuto a luna taba ye mueteleli wa naha ukona kukena kuyona ni kutusa kakuya ka kalulo yelubulezi yeo fa halimu,” ba zwelapili cwalo.
Bakonile kuhatelela hape kuli taba ye iswanezwi kutalimiwa ka sipolitiki sina haili taba yaza lipolitiki. “Kamaikuto a luna , lulyanganiswa ki babafa maata kwa baatuli mwa naha, kubulela ni kufa nzila ku muatuli mwa Khuta kufa katulo mwa nzila yesaswaneli, sihulu bayemeli ba muuso kutoya babanyazwa.”ba ekeza cwalo.
Bazamaisi ba kopano ya UDP mwa sikiliti sa Kapilivi bana ni tutengo totushelana shelana mane ni babañwi baba ikemezi mwa naha Namibia baba utwa butuku kayona taba ye mi banze balika kubulela ni kukupa ku lukululwa kwa bana ba Kapilivi mwa tolongo.
“Fa taba ya kuli ba taikutwa ku lukuluha; ba bañwi bakali basa lukululwa feela mwa tolongo bakaikinga kuli kele balukuluha mi baka sinyasinya kozo, ku kataza mane ni kulobaka mulao. Hakicwalo, yeo haina kuba yona taba, kono lubalakaleza kuli bato amuhela moya wa cinceho ni swalisano haba kena mwa hala sicaba ni kozo.”ba hatelele hape.
Mwa poto ya bona kwa muleneñi kwa windoko ili muleneñi wa Namibia ma sitatimende abona neba izo a tambeka kwa maofesi aba katengo ka kabona za liswanelo za buntu kona ka (National Society for Human Rights), Ombudsman, katengo kaka yemela likeleke mwa Namibia (CCN) mueteleli wa silalanda sa SADC tribunal, mueteleli wa kopano ya RP Mutompehi Henk Mudge, Andimba Toivo ya Toivo, Dr. Bishop Kameeta, ma ofesi a lindumeleti a swana sina; USA, Britain, German, France, Botswana, South Africa, Tanzania, Nigeria, Ofesi ya UN yeli mwa Namibia, European Union mane cwalo ni mueteleli Hifikepunye Pohamba wa Namibia.
Loading …