Mubihi wa Koranta
KHUTA ya Sikiliti ya Ka tima Mulilo nei zwisize Muuna wa lipisinisi mwa muzeko,Mutompehi Philip Oppermann, ya luwile pisinisi ye panga matina yona ya Katima Brick making yo nabulaile mubeleki wa hae mwa Kweli ya Ňulule hane ina ni mazazi a supa silimo sa 2006.
Nyandi Pius Matengu Liwena yonatimezi lifu la ku kunupiwa ki mubelekisi wahae , yena Philip Oppermann la 7 Ňulule 2006
Nyandi Pius Matengu Liwena yonatimezi lifu la ku kunupiwa ki mubelekisi wahae , yena Philip Oppermann la 7 Ňulule 2006
Mwa muzeko wa 42/12/06 wo neu kalile kuzwa 2006 kusina zeňata zetata kuyena kono kabunolo luli. Na zwisizwe kuzekela fande ka mali a likana likiti ze mashumi a mabeli a madola (N$20,000) awo nalifile onafo mwa lihola ze lishumi nizepeli (12 hours) kasamulaho nyana akutamiwa. Mali akuzekela fande analifile awo, hakuzibahali yana mutomezi ona mwa lihola nyana feela lizazi leliswana lana bulaile mubeleki wa hae mi azwisiwa kamamiso kanako ya 17 hours mwalizazi leliswana la 7 ňulule 2006 Koranta ye haisika fumana kale buniti kumuňoli wa Khuta kuli yana tomile mali akuzekela fande ku Mutompehi Oppermann kimaňi sina hakubonahala kuhohana mwahala batikitibi ba sipokola ni muyemeli wa sicaba wa mulao mwa nako yani.
Kuya ka katulo ya Khuta, yene iatuzwi ki Khuta ya Sikiliti ya Katima Mulilo, Mubusisi wa Khuta ya Sikiliti William Kasitomo mwa kweli ya Muyana hane ina ni mazazi a lishumi nia ketalizoho, ya nyazwa Oppermann, ili mubelekisi wa nyandi Pius Matengu Liwena na fumanwi kutokwa mulatu kanyazo ya bubulayi.
Mwa buka ya Khuta moku ňoliwanga mizeko, Muyemeli wa Sicaba wa mulao Mutompehi Jatiel Mudamburi na taluselize Koranta ya Liito la Kapilivi kuli “ya nyazwa na bulezi kuli hana mulatu kakuli yena na itamulela, Khuta yona ya atula kuli nekusina bupaki bone buhanyelisa buitamuleli bwa hae sina hane ili bababeli feela ya nyazwa ni nyandi foo kezo hane iezahala.” Kwa tatulula Muyemeli wa mulao wa sicaba.
Zeo ni halili cwalo, wa lubasi ya bilaela yana iketezi kusa zibahazwa na fitisize pilaelo ya hae kakubulela kuli mulao neusika bulukiwa sina kwa makalelo ya nyazwa na fiwa toompo ye tuna ahulu “ kusana ni kusa latelela mulao mwa kamaiso ya likhuta, kutaha cwaňi kuli muyemeli wa Sicaba wa mulao ukona ku lukulula sibulai kakufonelwa ka muhala feela mi abulelela mapokola kumu lukulula fa muhala…nelu boni kuli babaňwi haba tamiwa ba kwalelwa mwa sitokisi kakusa lifa mali atuso (maintenance) kwa Khuta a bana ba bona nihaba kona kulifa mali akuzekela fande neba hapelezwanga kuina mwa sitokisi sa Mapokola” a bulela .
“Halusika kenisezwa nikanako ye kaza muzeko, kakuli yanyazwa lizazi la hae lapilli mwa Khuta na talusize kuli na bulaile nyandi ka mafosisa mi mwa nako yacwale masitatimende ha asa swana mi haiba kuli na itamulela, kikai kwana holofezi? Naka supeza kolofalo ya hae …. Nafumani nyandi mwa ndu ya kulondela (guard room) kakuli nali fa musebezi isi mwa lipulukelo, mi muzeko neu kwaluzwi ka lifu la kusaitekela culpable homicide” kwa hatelela wa lubasi.
A talusa hape kuli nekuli butata kubalubasi kukona ku teeleza kwa muzeko ili ku utwa katulo ya mafelelezo sina sicaba kaufela hane sisika lumelelwa ku kena mwa Khuta.
“Neli yena ya nyazwa anosi yanali mwa Khuta, mi neni likile linzila zeňata kukena mwateni sina hanili wa mulao nina mi nenitinile liapalo za musebezi mi na kena”.
Zakwa mulaho
Kukulubelwa kuli Mutompehi Oppermann na sebelisize tobolo yahae yafa noka kukunupa nyandi Mutompehi Liwena yo nafumani anze a lobezi fa musebezi ili mwa sibaka sa pisinisi ya hae mwa lihola za mapakela za kweli ya Ňulule hane ina ni mazazi a supa silimo sa 2006. Mutompehi Liwena, (yanana ni lilimo ze mashumi a malalu ni a silela), natimezi kasamulaho mwa sipatela sa muuso sa Katima Mulilo ka kolofalo ya mwatoho yene kulubelwa kutiswa ki kukunupiwa ka tobolo ku Mutompehi Oppermann.
Mapokola ba Namibia batama mutompehi Oppermann la 7 Ňulule 2006 mi kala muzeko wa pili kakutala mwa lizazi leliswana mi a tomelwa mali akuzekela fande lizazi leliswana. Akena muzeko la bubeli kalizazi la 13 Ňulule 2006, labulalu la muzeko neli 15 Ňulule 2007, kasamulaho nasika taha kwa muzeko kakuli muzeko neu isizwe kwa pata mwa kweli ya Yowa 4, 2008, mi kuzwa foo nasikaya kwa muzeko kulatelela kuisiwa kwa paata hape mwa kweli ya Lungu 1, 2008, 18 Sikulu 2008 mi nakeni la mafelelezo mwa muzeko wa Khuta yenyinyani ya Katima Mulilo yona district lower court kala 6 Yenda 2008 foo nabulelezwi ki Mubusisi ya pumulisizwe Mufumahali Rachel Sakala kutaha kwa muzeko la 16 Yowa 2009 foo taba hane izo cincwa kubeiwa mwa Khuta ya Sikiliti ya Katima Mulilo.
Nihakuli cwalo, wa lubasi yasika zibahazwa yoo na taluselize Koranta ye kuli kutatuba situpu neku palile kuezahala mwa sipatela ki Dokota Simasiku Kabanje wa Sipatela sesituna sa Muuso sa Katima Mulilo mwa nako yaani kulatelela likanyi zene zili mwa hala lubasi mi situpu nesi lumezwi kwa sipatela sesituna sa muuso sa Rundu koo tatubo ya situpu neilo bela teni, Koranta ye neisika fumana kuli kimaňi yana ilo tatuba situpu kwa Rundu.
“ Kiňi hana tomezwi mali akuzekela fande kapili, kakuli mutikitibi wa taba nabulezi kuli nasika lemuswa, hape isali kali 15 Ňulule 2007 naswanela kutaha kwa muzeko mwa Khuta kono nasika taha mi na bonahezi kwa Museto wa Zambia, inge atinile siapalo ni kaputula mi foo luna ba lubasi neluli mwa Khuta kikabaka laňi hane basika mubeyela limamela kwa pasa yahae sina mone lubonelanga kubabaňwi haba sika taha kwa muzeko neba lumelwanga pampili yakutamiwa, lubata mulao osatalimi mwa inezi mutu” kwa bulela wa lubasi yana iketezi kusa zibahazwa.
Loading …