Zambezi ifumana Mubusisi yo munca wa Musali

Mubihi wa Koranta

SIKILITI sa Zambezi sikaba mwa kamaiso ya musali kuba mubusisi wa sikiliti, yena ya tompeha , Dorothy Mareka-Kabula,wa lilimo ze mashumi a silezi (62), ili yo neli Nduna wa silalanda sa Linyanti.Hape kiyena musali wa pili kuba mubusisi wa sikiliti sa Zambezi.

Ya tompeha Kabula neli yo mumwi wa Katengo ka Manduna (National Council)  mwa silimo sa 2004 kiuisa 2010, ni kuba Nduna (Councillor) wa Silalanda sa Linyanti mwa silimo sa 2004 kuisa silimo sa 2010 mwa kopano ye busa ya SWAPO.

U ngile mushukwe kuyola ya na inzi fa sipula sa Bubusisi , Mutompehi Lawrence Alufea Sampofu,mi uketilwe ki mueteleli wa naha Namibia, Netumbo Nandi-Ndaitwa la bubeli Sikulu haina ni lizazi li liñwi (1) , silimo se sa 2025.

Kwa mulaho, sikiliti sa Caprivi seo sese sizibahala ka libizo la Zambezi mwanako ya cwale nesibile mwa kamaiso ya Mubusisi wa pili, Mutompehi Felix Mukasa yo hape na latelezwi ki Mutompehi John Nabutunga Mabuku ili yo seli nyandi ili yo naizo timelela kwande ya naha mwa Botswana, bubeli bwa bona ne babusize sikiliti mwa silimo sa 1992 kuisa 1998 inge ili ba kopano ya DTA, Mutompehi Bernard Songa Sibalatani ubile mubusisi kuzwa silimo sa 1998 kuisa 2007 mwa kopano ya (SWAPO),Ya mutatama Mutompehi Leonard Yambwa Mwilima na busize sikiliti sa Caprivi kuzwa 2008 kuisa 2010, ni Mutompehi Alfea Sampofu wa kopano ya SWAPO mi yo ya busize sikiliti sa Zambezi kuzwa silimo sa 2010 kuya kali 30 Mbuwana 2025.