Subscribe | Contact Us | About Us | Post Classified Ad

Balekisi ba Zambia ba bilaezwa ki Milao ye mincha ya Batelisi ba libyana kwa Museto wa Naha Namibia

Mubihi ki Risco  Lumamezi

Sikwata sa Balekisi ba Naha Zambia niba Lipisinisi ba fitisize Maikuto a bona fahalimu a likezahalo za cwale-cwale kwa Museto wa WENELA, kose kutomilwe mulao o munca wa kusa balumelela ku sebelisa miyaho ya lipulukelo ya likolo la Batelisi ba libyana la Namibia.

Balekisi ni ba lipisinisi ba sabisizwe ahulu kuli beyezwi silookwa mi ba kulubela kuli bakaba mbuya ya ku uzwezwa musihali libyana zeba bata kulekisa kwande a Naha Namibia.Muyaho wa lipulukelo ki sibaka sesi silelelizwe, Moku bulukiwa libyana mi hape lisa kona kupangiwa mwateni kusina tifo ya mutelo ni olikani.Kuya ka buka ya manzwi a tolokilwe ya Wikipedia, Lipulukelo leo li kona ku luwiwa ki Muuso kapa ba lipisinisi zakwa mukunda.Libyana hali mano kena mwa lipulukelo, Musilisi wa libyana ni ya zamaisa muyaho wa lipulukelo ba tamana silikani, silikani seo sa feliswa foo libyana hase lisilisizwe.Mwa liňolo lene liňolezwi Mubusisi wa Sikiliti sa Kapilivi, ya tompeha Lawrence Sampofu, Balekisi neba bulela kuli neba sika bulelelwa pili mulao usika hatiswa kale kwa Museto wa Namibia ni Zambia.

“Nelu lekisana ni mina kaku latelela mulao wa COMESA, Muuso wa Naha Namibia ni Milao ya SADC ni kuli buluka mi mwa nako ya cwale ku bonahala fo kusweu kuli selu zwa mwa kamaiso ya mulao mi mwa busihu bulibuňwi feela kele mu beya kusilookwa fa halimu aluna kusina ni haike temuso.”

Bo Mutompehi John Musiwa, bo muina sipula wa Sesheke Business Community ba nitifalize kwa Liito la Kapilivi hane babuzizwe ku talusa ka tatululo yene fumanwi. Bo Musiwa ba patulula hape kuli Liňolo neli baleha hape kuli libyana zeba bata neli lekilwe pili basika beya kusilookwa (sanction) fa halimwa bona.

“Sina ka Bana ba Sesheke ba Lipisinisi, lu tusa ahulu kuzwiseza pili Sifumu sa Sikiliti sa Kapilivi mane cwalo niza buikezezo za Linaha zepeli ze, Zambia ni Namibia”

“Kuhula kokutuna kwa lisupo ki kusa latelela mulao wa Namibia wa Batelisi bafa Museto, Lipisinisi ze tuna za Namibia zeli mwa Sikiliti seba hanisizwe kusa isa libyana za baleki kwa Museto, “Kwa baleha saanda sa Liňolo.

Yo Muhulu wa pisinisi ya Zambezi Duty Free mwa Katima Mulilo ya Namibia , Mutompehi Ahmed Ahmed a talusa kuli Offesi ya Batelisi ba libyana za kwa Museto ya Sikiliti nei sika lemusa ba lipisinisi kaufela ka licincheho, sina taba ye hase itisize maswe kukutela kwa mulaho kwa pisinisi yahaye kubeya cwalo ni kusinyehelwa musebezi kwa babeleki ba haye.

Mutompehi Ahmed utalusize hape kuli, Batelisi ba libyana zakwa Museto neba sika fa mabaka atezi kaku ba yemisa kusa isezanga baleki ba bona libyana kwa museto ili kwa lineku la Naha Namibia.

“Lu kalile kale ku longelanga baleki ba luna libyana kuzwa silimo sa 2008.

Nelu bulelezwi kuli lusike lwa isanga Libyana kwa museto kono kuno isanga kwa Zambia mi kaku eza cwalo , liswanela kutatubiwa kaufela zona ki Batelisi ba libyana fa museto kwa Naha Zambia” a talusa cwalo.

Zeo ni halilicwalo, Mubakweli ku Muokameli wa Ofesi ya batelisi ba libyana kwa museto mwa Sikiliti sa Kapilivi Mutompehi Willbroad Poniso, u hanile likakalezo za kuli ofesi yahaye nei beile kusilookwa fa halimu a balekisi ba Naha Zambia, ka kutalusa kuli licincheho neli beilwe kaku latelela milao ya Naha Namibia ye tomilwe sina kwa mulaho lika kaufela neli ezahala kaku lwanisana ni milao ya butelisi wa libyana kwa museto.

“Bona (Ba lipisinisi ni balekisi ba Naha Zambia) neba tisa kukubukana koku ňata kwa Museto. Lubata kuli libyana za bona likuno ya mwa Zambia isi mwa Namibia. Libyana kapa misebezi ye fezwa ku tatubiwa liswanela ku isiwa  mwa Naha Zambia ona foo feela.” A bulela cwalo.

Bo Mutompehi Poniso ba ekeza ku talusa hape kuli lipulukelo la bona lipangezwi libyana zeya kwande mi hakuna tuso ya ba lipisinisi ba Zambia ku sebelisa sibyana sa Namibia kufita ku isa kwa Museto wa bona kuyo lingela teni.

“Halu tokwi mikwa ya ndwa. Museto wa Naha Namibia kamita utezi limbaya-mbaya ze nyinyani(taxis) ze longa batu za Zambia baba kwaeza kukena mwa Namibia kuto shimba bucwala bobuňata ni libyana zeňwi cwalo.”

%d bloggers like this: